DL and RC Mobile Number Update 2026: ಈಗ ನಿಮ್ಮ ಮೊಬೈಲ್‌ನಲ್ಲೇ ಮಾಡಿ

ನಿಮ್ಮ ಮೊಬೈಲ್‌ಗೆ ಇತ್ತೀಚೆಗೆ “Parivahan.gov.in: All vehicle owners are requested to add/update and confirm the mobile number…” ಅಂತ ಒಂದು ಮೆಸೇಜ್ ಬಂದಿದೆಯಾ? ಅದನ್ನು ನೋಡಿ “ಇದು ಫೇಕ್ ಇರಬಹುದು” ಅಂತ ಡಿಲೀಟ್ ಮಾಡಿಬಿಟ್ರಾ?

ಹಾಗಾದರೆ ಈ ಲೇಖನವನ್ನು ಪೂರ್ತಿ ಓದಿ. ಯಾಕಂದ್ರೆ ಆ ಮೆಸೇಜ್ ನಿಜವಾದದ್ದು. ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ (MoRTH) ಆಧಾರ್ ಆಧಾರಿತ ದೃಢೀಕರಣ ಬಳಸಿ ಡ್ರೈವಿಂಗ್ ಲೈಸೆನ್ಸ್ ಮತ್ತು ವಾಹನ ನೋಂದಣಿ ಪ್ರಮಾಣಪತ್ರಕ್ಕೆ ಲಿಂಕ್ ಆಗಿರುವ ಮೊಬೈಲ್ ನಂಬರ್ ಅಪ್‌ಡೇಟ್ ಮಾಡುವುದನ್ನು ಕಡ್ಡಾಯಗೊಳಿಸಿದೆ. ಇದರಿಂದ ಇ-ಚಲನ್, ನವೀಕರಣ ಎಚ್ಚರಿಕೆ, ತೆರಿಗೆ ಮತ್ತು ವಿಮೆ ಜ್ಞಾಪನೆಗಳು ಸಕಾಲದಲ್ಲಿ ತಲುಪುತ್ತವೆ.

ಇವತ್ತಿನ ಈ ಲೇಖನದಲ್ಲಿ ನಾವು — ವಾಹನದ RC ಗೆ ಮತ್ತು ಡ್ರೈವಿಂಗ್ ಲೈಸೆನ್ಸ್‌ಗೆ ಲಿಂಕ್ ಆಗಿರುವ ಮೊಬೈಲ್ ನಂಬರ್ ಅನ್ನು RTO ಕಚೇರಿಗೆ ಹೋಗದೆ, ಮನೆಯಲ್ಲೇ ಕೂತು, ಒಂದೇ ರೂಪಾಯಿ ಖರ್ಚಿಲ್ಲದೆ ಹೇಗೆ ಅಪ್‌ಡೇಟ್ ಮಾಡಿಕೊಳ್ಳಬಹುದು ಅನ್ನೋದನ್ನು ಸ್ಟೆಪ್ ಬೈ ಸ್ಟೆಪ್ ನೋಡೋಣ. ಜೊತೆಗೆ OTP ಬರದಿದ್ದರೆ ಏನು ಮಾಡಬೇಕು, ಯಾವ ತಪ್ಪುಗಳು ಸಾಮಾನ್ಯ, ಯಾವಾಗ RTO ಗೆ ಹೋಗಲೇಬೇಕು — ಎಲ್ಲವನ್ನೂ ಸರಳ ಕನ್ನಡದಲ್ಲಿ ವಿವರಿಸ್ತೀನಿ.

 ಒಂದು ನೋಟದಲ್ಲಿ ಮಾಹಿತಿ

ವಿಷಯ	ವಿವರ
ಸೇವೆಯ ಹೆಸರು	DL & RC Mobile Number Update
ಇಲಾಖೆ	ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ (MoRTH)
ಪೋರ್ಟಲ್	Vahan (RC) ಮತ್ತು Sarathi (DL)
ಅರ್ಜಿ ವಿಧಾನ	ಸಂಪೂರ್ಣ ಆನ್‌ಲೈನ್
ಪರಿಶೀಲನೆ	Aadhaar OTP / Registered Mobile OTP
ಶುಲ್ಕ	ಉಚಿತ (ಹೆಚ್ಚಿನ ರಾಜ್ಯಗಳಲ್ಲಿ)
ತಗಲುವ ಸಮಯ	5–10 ನಿಮಿಷ
ಯಾರಿಗೆ ಅನ್ವಯ	ಎಲ್ಲಾ ವಾಹನ ಮಾಲೀಕರು ಮತ್ತು DL/LL ಹೊಂದಿರುವವರು

ಈ ವಿಷಯ ಈಗ ಯಾಕೆ ಇಷ್ಟು ಚರ್ಚೆಯಲ್ಲಿದೆ?

ಕಳೆದ ಕೆಲ ತಿಂಗಳುಗಳಿಂದ ದೇಶದಾದ್ಯಂತ ವಾಹನ ಮಾಲೀಕರಿಗೆ ಮತ್ತು ಲೈಸೆನ್ಸ್ ಹೊಂದಿರುವವರಿಗೆ ಸರ್ಕಾರದಿಂದ SMS ಬರ್ತಿದೆ. ಅದರಲ್ಲಿ “ನಿಮ್ಮ ಮೊಬೈಲ್ ನಂಬರ್ ಅನ್ನು ಆಧಾರ್ ದೃಢೀಕರಣದ ಮೂಲಕ ಸೇರಿಸಿ ಅಥವಾ ಖಚಿತಪಡಿಸಿ” ಅಂತ ಹೇಳಲಾಗ್ತಿದೆ.

ಬಹಳ ಜನ ಇದನ್ನು ಫ್ರಾಡ್ ಮೆಸೇಜ್ ಅಂತ ಭಾವಿಸಿದ್ದಾರೆ. ಆದರೆ ವಾಸ್ತವ ಬೇರೆ.

2021ರ ಜನವರಿ 24ರ MoRTH ಆದೇಶವು ಸಾರಿಗೆ ಕ್ಷೇತ್ರದಲ್ಲಿ “ಸಂಪರ್ಕರಹಿತ ಸೇವೆ” ನೀಡಲು ಆಧಾರ್ ದೃಢೀಕರಣ ಬಳಸಲು ಅವಕಾಶ ಕಲ್ಪಿಸಿತ್ತು — ಖುದ್ದು ಭೇಟಿಗಳನ್ನು ಕಡಿಮೆ ಮಾಡಿ ಲೈಸೆನ್ಸ್/ನೋಂದಣಿ ಸೇವೆಗಳನ್ನು ಸುಗಮಗೊಳಿಸುವುದು ಇದರ ಉದ್ದೇಶ. ನಂತರ 2022ರ ಸೆಪ್ಟೆಂಬರ್ 16ರಂದು ಸಚಿವಾಲಯವು 58 “ನಾಗರಿಕ ಕೇಂದ್ರಿತ” ಸೇವೆಗಳನ್ನು ಸಂಪೂರ್ಣ ಆನ್‌ಲೈನ್‌ನಲ್ಲಿ ಪೂರ್ಣಗೊಳಿಸಬಹುದು ಎಂದು ಅಧಿಸೂಚನೆ ಹೊರಡಿಸಿತು — ಕಲಿಕಾ ಪರವಾನಗಿಯಿಂದ ವಿಳಾಸ ಬದಲಾವಣೆಯವರೆಗೆ ಎಲ್ಲವೂ ಆಧಾರ್ ದೃಢೀಕರಣದ ನೆರವಿನಿಂದ ಸಾಧ್ಯ.

ಇದರ ಅರ್ಥ ಸರಳ — ಈಗ ಸಾರಿಗೆ ಇಲಾಖೆಯ ಬಹುತೇಕ ಎಲ್ಲಾ ಸೇವೆಗಳು OTP ಆಧಾರಿತ. ಆದರೆ OTP ತಲುಪಬೇಕಾದರೆ ನಿಮ್ಮ ದಾಖಲೆಯಲ್ಲಿರುವ ಮೊಬೈಲ್ ನಂಬರ್ ಸರಿಯಾಗಿರಬೇಕು. ಹಳೆಯ ನಂಬರ್ ಇದ್ದರೆ ಯಾವ ಸೇವೆಯೂ ನಿಮಗೆ ಸಿಗುವುದಿಲ್ಲ.

ಅದಕ್ಕೇ Vahan (ವಾಹನ/RC) ಮತ್ತು Sarathi (ಲೈಸೆನ್ಸ್/DL) ಎರಡೂ ಪೋರ್ಟಲ್‌ಗಳಲ್ಲಿ ಈಗ “Update Your Mobile Number” ಎಂಬ ದೊಡ್ಡ ಬ್ಯಾನರ್ ಕಾಣಿಸುತ್ತಿದೆ.

ಇದನ್ನು ಓದಿ:-Caste certificate 2026: ಅರ್ಹತೆ, ದಾಖಲೆಗಳು ಮತ್ತು ಡೌನ್‌ಲೋಡ್ ವಿಧಾನ

 ಮೊದಲು ಇದನ್ನು ಅರ್ಥ ಮಾಡಿಕೊಳ್ಳಿ: Vahan ಮತ್ತು Sarathi ವ್ಯತ್ಯಾಸ

ಬಹಳ ಜನ ಇಲ್ಲೇ ಗೊಂದಲಕ್ಕೆ ಒಳಗಾಗ್ತಾರೆ. ಎರಡೂ parivahan.gov.in ಅಡಿಯಲ್ಲೇ ಬರುತ್ತವೆ, ಆದರೆ ಕೆಲಸ ಬೇರೆ ಬೇರೆ.

ಅಂಶ	Vahan ಪೋರ್ಟಲ್	Sarathi ಪೋರ್ಟಲ್
ಯಾವುದಕ್ಕೆ ಸಂಬಂಧಿಸಿದೆ	ವಾಹನ, RC (Registration Certificate)	ಡ್ರೈವಿಂಗ್ ಲೈಸೆನ್ಸ್, ಲರ್ನಿಂಗ್ ಲೈಸೆನ್ಸ್
ಬೇಕಾದ ಮುಖ್ಯ ವಿವರ	ವಾಹನ ನೋಂದಣಿ ಸಂಖ್ಯೆ, ಚಾಸಿಸ್ ನಂಬರ್	DL ನಂಬರ್, ಜನ್ಮ ದಿನಾಂಕ
ಉದಾಹರಣೆ	KA 01 AB 1234	KA0120XXXXXXXX
ಸೇವೆಗಳು	ತೆರಿಗೆ ಪಾವತಿ, RC ವರ್ಗಾವಣೆ, ಫಿಟ್‌ನೆಸ್	DL ನವೀಕರಣ, ವಿಳಾಸ ಬದಲಾವಣೆ, ಡುಪ್ಲಿಕೇಟ್ DL

ಸರಳವಾಗಿ ಹೇಳೋದಾದ್ರೆ:

• ವಾಹನಕ್ಕೆ ಸಂಬಂಧಿಸಿದ್ದು = Vahan
• ಚಾಲಕನಿಗೆ ಸಂಬಂಧಿಸಿದ್ದು = Sarathi

 ನಿಮ್ಮ ಬಳಿ ಬೈಕ್/ಕಾರ್ ಇದ್ದು, ಡ್ರೈವಿಂಗ್ ಲೈಸೆನ್ಸ್ ಕೂಡ ಇದ್ದರೆ — ಎರಡೂ ಕಡೆ ಪ್ರತ್ಯೇಕವಾಗಿ ಅಪ್‌ಡೇಟ್ ಮಾಡಬೇಕು. ಒಂದು ಕಡೆ ಮಾಡಿದರೆ ಇನ್ನೊಂದು ಕಡೆ ಆಗಿಬಿಡುತ್ತೆ ಅನ್ನೋದು ತಪ್ಪು ಕಲ್ಪನೆ.

ಅಪ್‌ಡೇಟ್ ಮಾಡುವ ಮೊದಲು ಸಿದ್ಧಪಡಿಸಿಕೊಳ್ಳಬೇಕಾದ ವಸ್ತುಗಳು

ಪ್ರಕ್ರಿಯೆ ಶುರು ಮಾಡುವ ಮೊದಲು ಇವನ್ನು ಕೈಯಲ್ಲಿಟ್ಟುಕೊಳ್ಳಿ. ಇಲ್ಲದಿದ್ದರೆ ಮಧ್ಯದಲ್ಲೇ ಸೆಷನ್ ಟೈಮ್‌ಔಟ್ ಆಗಿ ಮತ್ತೆ ಶುರುವಿಂದ ಮಾಡಬೇಕಾಗುತ್ತೆ.

1. ನಿಮ್ಮ RC ಅಥವಾ ವಾಹನ ನೋಂದಣಿ ಸಂಖ್ಯೆ – ಗಾಡಿಯ ನಂಬರ್ ಪ್ಲೇಟ್‌ನಲ್ಲಿರುವಂತೆ
2. ಚಾಸಿಸ್ ನಂಬರ್‌ನ ಕೊನೆಯ 5 ಅಂಕಿಗಳು – RC ಕಾರ್ಡ್/ಬುಕ್‌ನಲ್ಲಿ ಸಿಗುತ್ತದೆ
3. ಡ್ರೈವಿಂಗ್ ಲೈಸೆನ್ಸ್ ನಂಬರ್ – DL ಕಾರ್ಡ್ ಮೇಲೆ
4. ಜನ್ಮ ದಿನಾಂಕ – DL ನಲ್ಲಿ ಇರುವಂತೆಯೇ (ಆಧಾರ್‌ನಲ್ಲಿರುವಂತೆ ಅಲ್ಲ!)
5. ಆಧಾರ್ ಕಾರ್ಡ್ ನಂಬರ್
6. ಆಧಾರ್‌ಗೆ ಲಿಂಕ್ ಆಗಿರುವ ಮೊಬೈಲ್ – OTP ಬರಲು ಇದು ಕಡ್ಡಾಯ
7. ಹೊಸ ಮೊಬೈಲ್ ನಂಬರ್ – ಸಕ್ರಿಯವಾಗಿರಬೇಕು, ಕೈಯಲ್ಲೇ ಇರಬೇಕು
8. ಒಳ್ಳೆಯ ಇಂಟರ್ನೆಟ್ ಸಂಪರ್ಕ

 ಟಿಪ್: ಸಾಧ್ಯವಾದರೆ ಮೊಬೈಲ್ ಬದಲು ಲ್ಯಾಪ್‌ಟಾಪ್/ಡೆಸ್ಕ್‌ಟಾಪ್ ಬಳಸಿ. Sarathi ಪೋರ್ಟಲ್ Google Chrome 140+, Microsoft Edge 140+, Mozilla Firefox 140+ ಮತ್ತು Opera 120+ ಬ್ರೌಸರ್‌ಗಳಲ್ಲಿ ಉತ್ತಮವಾಗಿ ಕೆಲಸ ಮಾಡುತ್ತದೆ; 1366 × 768 ಅಥವಾ ಹೆಚ್ಚಿನ ಸ್ಕ್ರೀನ್ ರೆಸಲ್ಯೂಷನ್ ಶಿಫಾರಸು ಮಾಡಲಾಗಿದೆ. ಮೊಬೈಲ್‌ನಲ್ಲಿ ಮಾಡುವುದಾದರೆ ಬ್ರೌಸರ್‌ನಲ್ಲಿ Desktop Site ಆಯ್ಕೆ ಆನ್ ಮಾಡಿಕೊಳ್ಳಿ — ಪುಟ ಸರಿಯಾಗಿ ತೆರೆಯುತ್ತದೆ.

RC ಮೊಬೈಲ್ ನಂಬರ್ ಅಪ್‌ಡೇಟ್ (Vahan ಪೋರ್ಟಲ್) – Step by Step

ಹಂತ 1: ಅಧಿಕೃತ ಪುಟ ತೆರೆಯಿರಿ

ನಿಮ್ಮ ಬ್ರೌಸರ್‌ನಲ್ಲಿ ಈ ವಿಳಾಸ ಟೈಪ್ ಮಾಡಿ:

https://vahan.parivahan.gov.in/mobileupdate/

ಗೂಗಲ್‌ನಲ್ಲಿ ಹುಡುಕಿ ಯಾವುದೋ ಲಿಂಕ್ ಮೇಲೆ ಕ್ಲಿಕ್ ಮಾಡಬೇಡಿ. ಯಾಕಂದ್ರೆ ಇದೇ ಹೆಸರಿನ ನಕಲಿ ವೆಬ್‌ಸೈಟ್‌ಗಳು ಸಾಕಷ್ಟಿವೆ. ವಿಳಾಸ ಕೊನೆಯಲ್ಲಿ .gov.in ಇದೆಯಾ ಅಂತ ಖಚಿತಪಡಿಸಿಕೊಳ್ಳಿ.

ಹಂತ 2: ರಾಜ್ಯ ಆಯ್ಕೆ ಮಾಡಿ

ಪುಟ ತೆರೆದ ನಂತರ ರಾಜ್ಯ ಆಯ್ಕೆ ಮಾಡುವ ಆಯ್ಕೆ ಬರಬಹುದು. ಕರ್ನಾಟಕದವರು Karnataka ಆಯ್ಕೆ ಮಾಡಿ. ನಿಮ್ಮ ವಾಹನ ಬೇರೆ ರಾಜ್ಯದಲ್ಲಿ ನೋಂದಣಿಯಾಗಿದ್ದರೆ ಆ ರಾಜ್ಯವನ್ನೇ ಆಯ್ಕೆ ಮಾಡಬೇಕು — ನೀವು ಈಗ ಎಲ್ಲಿ ವಾಸ ಮಾಡ್ತಿದ್ದೀರಿ ಅನ್ನೋದು ಮುಖ್ಯ ಅಲ್ಲ.

ಹಂತ 3: ವಾಹನ ವಿವರ ನಮೂದಿಸಿ

ಇಲ್ಲಿ ನಿಮ್ಮ ವಾಹನ ನೋಂದಣಿ ಸಂಖ್ಯೆ ಹಾಕಿ. ಉದಾಹರಣೆಗೆ KA01AB1234.

• ಸ್ಪೇಸ್ ಕೊಡಬೇಡಿ, ಸ್ಪೆಷಲ್ ಕ್ಯಾರೆಕ್ಟರ್ ಹಾಕಬೇಡಿ
• ದೊಡ್ಡ ಅಕ್ಷರದಲ್ಲಿ (CAPITAL) ಟೈಪ್ ಮಾಡಿ
• ಕೆಲವೊಮ್ಮೆ ಚಾಸಿಸ್ ನಂಬರ್‌ನ ಕೊನೆಯ 5 ಅಂಕಿಗಳನ್ನು ಕೇಳಬಹುದು
• ನಂತರ Verify Details ಅಥವಾ Proceed ಬಟನ್ ಒತ್ತಿ.

ಹಂತ 4: ಮಾಲೀಕತ್ವ ದೃಢೀಕರಣ

ಈ ಹಂತದಲ್ಲಿ ನಿಜವಾಗಿಯೂ ನೀವೇ ವಾಹನದ ಮಾಲೀಕರಾ ಅಂತ ಸಿಸ್ಟಂ ಪರಿಶೀಲಿಸುತ್ತೆ. ಇಲ್ಲಿ ಎರಡು ಸಾಧ್ಯತೆಗಳಿವೆ — ನಿಮ್ಮ ರಾಜ್ಯ ಮತ್ತು ನಿಮ್ಮ ದಾಖಲೆಯ ಸ್ಥಿತಿಯ ಮೇಲೆ ಅವಲಂಬಿಸಿದೆ:

ಸಾಧ್ಯತೆ A – ಆಧಾರ್ ದೃಢೀಕರಣ:

ಆಧಾರ್ ನಂಬರ್ ಹಾಕಿ, UIDAI ನಲ್ಲಿ ನೋಂದಾಯಿತ ಮೊಬೈಲ್‌ಗೆ ಬರುವ OTP ಸಲ್ಲಿಸಿ ದೃಢೀಕರಿಸಬೇಕು. ಇದು ಈಗಿನ ಸಾಮಾನ್ಯ ವಿಧಾನ.

ಸಾಧ್ಯತೆ B – ಹಳೆಯ ನಂಬರ್‌ಗೆ OTP:

ನೋಂದಣಿ ಸಂಖ್ಯೆ ಮತ್ತು ಹಳೆಯ ಮೊಬೈಲ್ ನಂಬರ್ ಹಾಕಿ Generate OTP ಒತ್ತಿದರೆ ಹಳೆಯ ನಂಬರ್‌ಗೆ OTP ಬರುತ್ತದೆ; ಅದನ್ನು ಪರಿಶೀಲಿಸಿ ಹೊಸ ಮೊಬೈಲ್ ನಂಬರ್ ಹಾಕಿ ಸಲ್ಲಿಸಬೇಕು.

ಹಳೆಯ ನಂಬರ್ ಈಗ ನಿಮ್ಮ ಬಳಿ ಇಲ್ಲದಿದ್ದರೆ ಸಾಧ್ಯತೆ B ಕೆಲಸ ಮಾಡಲ್ಲ. ಆಗ ಆಧಾರ್ ಆಧಾರಿತ ವಿಧಾನವನ್ನೇ ಬಳಸಬೇಕು.

ಹಂತ 5: ವಿವರ ಪರಿಶೀಲಿಸಿ

OTP ಸರಿಯಾಗಿ ಹಾಕಿದ ನಂತರ ಪರದೆಯ ಮೇಲೆ ನಿಮ್ಮ ವಿವರಗಳು ಕಾಣಿಸ್ತವೆ — ಮಾಲೀಕನ ಹೆಸರು, ವಾಹನದ ಮಾದರಿ, ನೋಂದಣಿ ದಿನಾಂಕ ಇತ್ಯಾದಿ.

ಇವೆಲ್ಲಾ ಸರಿ ಇದೆಯಾ ಅಂತ ಒಮ್ಮೆ ಸರಿಯಾಗಿ ನೋಡಿ. ಇಲ್ಲಿ ಹೆಸರಿನಲ್ಲೇ ತಪ್ಪಿದ್ದರೆ ಅದನ್ನು ಬೇರೆ ಸೇವೆಯ ಮೂಲಕ ಸರಿಪಡಿಸಬೇಕಾಗುತ್ತೆ.

ಹಂತ 6: ಹೊಸ ಮೊಬೈಲ್ ನಂಬರ್ ನಮೂದಿಸಿ

ಈಗ New Mobile Number ಬಾಕ್ಸ್‌ನಲ್ಲಿ ನೀವು ಈಗ ಬಳಸುತ್ತಿರುವ ಸಕ್ರಿಯ ನಂಬರ್ ಹಾಕಿ.

• +91 ಹಾಕುವ ಅಗತ್ಯವಿಲ್ಲ, 10 ಅಂಕಿ ಸಾಕು
• ಎರಡನೇ ಬಾರಿ ಖಚಿತಪಡಿಸಲು ಕೇಳಿದರೆ ಅದೇ ನಂಬರ್ ಮತ್ತೆ ಹಾಕಿ

ಹಂತ 7: ಹೊಸ ನಂಬರ್‌ಗೆ OTP

ನಿಮ್ಮ ಹೊಸ ಮೊಬೈಲ್ ನಂಬರ್‌ಗೆ OTP ಕಳುಹಿಸಲಾಗುತ್ತದೆ; ಅದನ್ನು ವೆಬ್‌ಪುಟದಲ್ಲಿ ಸರಿಯಾಗಿ ನಮೂದಿಸಿ ಬದಲಾವಣೆಯನ್ನು ದೃಢೀಕರಿಸಬೇಕು.

OTP ಸಾಮಾನ್ಯವಾಗಿ 10 ನಿಮಿಷದವರೆಗೆ ಮಾತ್ರ ಮಾನ್ಯ. ತಡ ಮಾಡಬೇಡಿ.

ಇದನ್ನು ಓದಿ:-ಎಚ್ಚರ Aadhaar Authentication History:ಯಾರಾದರೂ ನಿಮ್ಮ ಆಧಾರ್ ಬಳಸುತ್ತಿದ್ದಾರೆಯೇ? 2 ನಿಮಿಷದಲ್ಲಿ ಹೀಗೆ ಚೆಕ್ ಮಾಡಿ

ಹಂತ 8: ಸಲ್ಲಿಕೆ ಮತ್ತು ಸ್ವೀಕೃತಿ

Submit ಒತ್ತಿದ ತಕ್ಷಣ ಯಶಸ್ವಿ ಸಂದೇಶ ಕಾಣಿಸುತ್ತೆ. ಯಶಸ್ವಿ ಪರದೆಯಲ್ಲಿ Application Reference Number (ARN) ಕಾಣಿಸುತ್ತದೆ — ಸ್ಥಿತಿ

ಈ ಪರದೆಯ ಸ್ಕ್ರೀನ್‌ಶಾಟ್ ತೆಗೆದು ಇಟ್ಟುಕೊಳ್ಳಿ. ಮುಂದೆ ಏನಾದರೂ ಸಮಸ್ಯೆ ಬಂದರೆ ಇದೇ ನಿಮ್ಮ ಸಾಕ್ಷಿ.

DL ಮೊಬೈಲ್ ನಂಬರ್ ಅಪ್‌ಡೇಟ್ (Sarathi ಪೋರ್ಟಲ್) – Step by Step

ಹಂತ 1: Sarathi ಪುಟಕ್ಕೆ ಹೋಗಿ

https://sarathi.parivahan.gov.in/sarathiservice/mobNumUpdpub.do

 

ಅಥವಾ parivahan.gov.in → Driving Licence Related Services → ರಾಜ್ಯ ಆಯ್ಕೆ ಮಾಡಿ → “Update Mobile Number” ಆಯ್ಕೆಗೆ ಹೋಗಬಹುದು.

 

ಹಂತ 2: ರಾಜ್ಯ ಆಯ್ಕೆ

Sarathi ಪೋರ್ಟಲ್‌ಗೆ ಹೋಗಿ ನಿಮ್ಮ ರಾಜ್ಯವನ್ನು ಆಯ್ಕೆ ಮಾಡಿ, ನಂತರ “Driving License” → “Services on Driver’s License” ಆಯ್ಕೆ ಮಾಡಬೇಕು.

ನಿಮ್ಮ DL ಯಾವ ರಾಜ್ಯದಲ್ಲಿ ವಿತರಣೆಯಾಗಿದೆಯೋ ಆ ರಾಜ್ಯವನ್ನೇ ಆಯ್ಕೆ ಮಾಡಿ. ಕರ್ನಾಟಕದ DL ಇದ್ದರೆ Karnataka.

ಹಂತ 3: DL ವಿವರ ನಮೂದಿಸಿ

ಡ್ರೈವಿಂಗ್ ಲೈಸೆನ್ಸ್ ನಂಬರ್, ಜನ್ಮ ದಿನಾಂಕ ಮತ್ತು ರಾಜ್ಯದ ವಿವರಗಳನ್ನು ನಮೂದಿಸಬೇಕು.

ಇಲ್ಲೇ ಬಹಳ ಜನ ತಪ್ಪು ಮಾಡುತ್ತಾರೆ. ಜನ್ಮ ದಿನಾಂಕ DL ನಲ್ಲಿ ಮುದ್ರಿತವಾಗಿರುವಂತೆಯೇ ಹಾಕಬೇಕು. ಆಧಾರ್‌ನಲ್ಲಿ ಬೇರೆ ದಿನಾಂಕ ಇದ್ದರೂ ಇಲ್ಲಿ DL ನದ್ದೇ ಹಾಕಬೇಕು.

DL ನಂಬರ್ ಫಾರ್ಮ್ಯಾಟ್ ಸಾಮಾನ್ಯವಾಗಿ ಹೀಗಿರುತ್ತೆ: KA01 20XX XXXXXXX — ಪೋರ್ಟಲ್ ಕೇಳುವ ರೀತಿಯಲ್ಲೇ ಹಾಕಿ. ಸ್ಪೇಸ್ ಇಲ್ಲದೆ ಪ್ರಯತ್ನಿಸಿ ನೋಡಿ; ಕೆಲಸ ಆಗದಿದ್ದರೆ ಹೈಫನ್ (-) ಜೊತೆ ಪ್ರಯತ್ನಿಸಿ.

ಹಂತ 4: ಆಧಾರ್ ದೃಢೀಕರಣ

ಆಧಾರ್ ನಂಬರ್ ನಮೂದಿಸಿ, UIDAI ನೋಂದಾಯಿತ ಮೊಬೈಲ್‌ಗೆ ಬರುವ OTP ಸಲ್ಲಿಸಿ ನಿಮ್ಮನ್ನು ದೃಢೀಕರಿಸಿಕೊಳ್ಳಿ.

ಮೊಬೈಲ್‌ಗೆ ಮರು-ನೋಂದಣಿ ಮಾಡಲು ಉದ್ದೇಶಿಸಿರುವ 12-ಅಂಕಿಯ ಆಧಾರ್ ಸಂಖ್ಯೆಯನ್ನು ನಮೂದಿಸಬೇಕು.

ಇಲ್ಲಿ “I agree” ಅಥವಾ consent ಚೆಕ್‌ಬಾಕ್ಸ್ ಇರುತ್ತೆ — ಅದನ್ನು ಟಿಕ್ ಮಾಡಿ.

ಹಂತ 5: ವಿವರ ಪರಿಶೀಲನೆ

ನಿಮ್ಮ ವೈಯಕ್ತಿಕ ವಿವರಗಳು ಸರಿಯಾಗಿ ತೋರಿಸಲ್ಪಟ್ಟಿವೆಯೇ ಎಂದು ಪರಿಶೀಲಿಸಿ Proceed ಒತ್ತಿ.

ಹಂತ 6: ಹೊಸ ನಂಬರ್ ಸೇರಿಸಿ ಅಥವಾ ಬದಲಾಯಿಸಿ

ನೀವು ಈವರೆಗೆ ಯಾವುದೇ ಮೊಬೈಲ್ ನಂಬರ್ ಲಿಂಕ್ ಮಾಡಿಲ್ಲದಿದ್ದರೆ ನಂಬರ್ ಸೇರಿಸುವ ಆಯ್ಕೆ ಸಿಗುತ್ತದೆ; ಈಗಾಗಲೇ ಹಳೆಯ ನಂಬರ್ ಲಿಂಕ್ ಆಗಿದ್ದರೆ ಅದನ್ನು ಅಪ್‌ಡೇಟ್ ಮಾಡುವ ಆಯ್ಕೆ ಸಿಗುತ್ತದೆ.

ಹೊಸ ನಂಬರ್ ಹಾಕಿ, ಅದಕ್ಕೆ ಬರುವ OTP ಹಾಕಿ ಸಲ್ಲಿಸಿ.

ಹಂತ 7: ದೃಢೀಕರಣ

ಪ್ರಕ್ರಿಯೆ ಪೂರ್ಣಗೊಂಡ ನಂತರ ನಿಮ್ಮ ಡ್ರೈವಿಂಗ್ ಲೈಸೆನ್ಸ್ ನೀಡಿದ ಮೊಬೈಲ್ ನಂಬರ್‌ನೊಂದಿಗೆ ಯಶಸ್ವಿಯಾಗಿ ಲಿಂಕ್ ಆಗುತ್ತದೆ.

 ಇದಕ್ಕೆ ಎಷ್ಟು ಶುಲ್ಕ?

ಇದು ಬಹಳ ಜನ ಕೇಳುವ ಪ್ರಶ್ನೆ. ಉತ್ತರ ಸಂತೋಷ ಕೊಡುತ್ತೆ —

ಡ್ರೈವಿಂಗ್ ಲೈಸೆನ್ಸ್‌ಗೆ ಫೋನ್ ನಂಬರ್ ಅಪ್‌ಡೇಟ್ ಅಥವಾ ಲಿಂಕ್ ಮಾಡಲು ಯಾವುದೇ ಶುಲ್ಕ ಇಲ್ಲ; parivahan.gov.in ನ ಅಧಿಕೃತ Sarathi ಪೋರ್ಟಲ್‌ನಿಂದ ಉಚಿತವಾಗಿ ಮಾಡಬಹುದು.

ಹಾಗಾಗಿ ಯಾರಾದರೂ “ನಾನು ಮಾಡಿಸಿಕೊಡ್ತೀನಿ, 500 ರೂಪಾಯಿ ಕೊಡಿ” ಅಂದ್ರೆ ನಂಬಬೇಡಿ. ಆನ್‌ಲೈನ್ ಸೆಂಟರ್‌ನಲ್ಲಿ ಮಾಡಿಸಿದರೆ ಅವರ ಸೇವಾ ಶುಲ್ಕ ಮಾತ್ರ ಕೊಡಬೇಕಾಗಬಹುದು — ಸರ್ಕಾರಕ್ಕೆ ಯಾವ ಶುಲ್ಕವೂ ಇಲ್ಲ.

ಆದರೆ ಒಂದು ವಿಷಯ ಗಮನದಲ್ಲಿಡಿ — ಆನ್‌ಲೈನ್ ಆಗದೆ RTO ಗೆ ಹೋಗಬೇಕಾದರೆ ಅಲ್ಲಿ ಫಾರ್ಮ್ ಮತ್ತು ಪ್ರಕ್ರಿಯಾ ಶುಲ್ಕ ಇರಬಹುದು. ಆಫ್‌ಲೈನ್ ವಿಧಾನದಲ್ಲಿ ಮೂಲ RC, ಹೊಸ ಸಿಮ್ ಪುರಾವೆ ಮತ್ತು ಫಾರ್ಮ್ ಜೊತೆ RTO ಭೇಟಿ ಅಗತ್ಯವಾಗಬಹುದು. ಶುಲ್ಕ ರಾಜ್ಯದಿಂದ ರಾಜ್ಯಕ್ಕೆ ಬದಲಾಗುತ್ತೆ.

ಅಪ್‌ಡೇಟ್ ಆಗಲು ಎಷ್ಟು ಸಮಯ ಬೇಕು?

ಬಹುತೇಕ ಸಂದರ್ಭಗಳಲ್ಲಿ ತಕ್ಷಣವೇ ಅಪ್‌ಡೇಟ್ ಆಗುತ್ತೆ. OTP ಪರಿಶೀಲನೆ ಮುಗಿದ ಕೂಡಲೇ ಹೊಸ ನಂಬರ್ ಸಿಸ್ಟಂನಲ್ಲಿ ದಾಖಲಾಗುತ್ತೆ.

ಆದರೆ ಕೆಲವು ರಾಜ್ಯಗಳಲ್ಲಿ RTO ಅನುಮೋದನೆ ಬೇಕಾಗಬಹುದು. ARN ಬಳಸಿ “Application Status” ನಲ್ಲಿ ಪರಿಶೀಲಿಸಬಹುದು — ಸಾಮಾನ್ಯವಾಗಿ 24–48 ಗಂಟೆಗಳಲ್ಲಿ “Approved” ತೋರಿಸುತ್ತದೆ.

ಪರಿಶೀಲಿಸುವ ಸರಳ ವಿಧಾನ: 2–3 ದಿನಗಳ ನಂತರ ಯಾವುದಾದರೂ Parivahan ಸೇವೆಗೆ ಲಾಗಿನ್ ಮಾಡಿ ನೋಡಿ. OTP ಹೊಸ ನಂಬರ್‌ಗೆ ಬಂದರೆ ಅಪ್‌ಡೇಟ್ ಯಶಸ್ವಿ ಆಗಿದೆ ಅಂತ ಅರ್ಥ.

 ಸಾಮಾನ್ಯ ಸಮಸ್ಯೆಗಳು ಮತ್ತು ಪರಿಹಾರ

ಇದು ಈ ಲೇಖನದ ಅತ್ಯಂತ ಮುಖ್ಯ ಭಾಗ. ಹೆಚ್ಚಿನ ಜನ ಇಲ್ಲೇ ಸಿಕ್ಕಿಹಾಕಿಕೊಳ್ತಾರೆ.

ಸಮಸ್ಯೆ	ಕಾರಣ	ಪರಿಹಾರ
OTP ಬರ್ತಿಲ್ಲ	ಆಧಾರ್‌ಗೆ ಮೊಬೈಲ್ ಲಿಂಕ್ ಆಗಿಲ್ಲ	ಆಧಾರ್ ಕೇಂದ್ರಕ್ಕೆ ಹೋಗಿ ಮೊಬೈಲ್ ಲಿಂಕ್ ಮಾಡಿಸಿ
“Details not found”	DL/RC ನಂಬರ್ ತಪ್ಪು ಫಾರ್ಮ್ಯಾಟ್	ಸ್ಪೇಸ್ ಇಲ್ಲದೆ, ಇದ್ದಂತೆಯೇ ಹಾಕಿ
“Invalid DOB”	ಆಧಾರ್ ದಿನಾಂಕ ಹಾಕಿದ್ದೀರಿ	DL ನಲ್ಲಿರುವ ದಿನಾಂಕವನ್ನೇ ಹಾಕಿ
ಪುಟವೇ ತೆರೆಯುತ್ತಿಲ್ಲ	ಸರ್ವರ್ ಒತ್ತಡ	ಬೆಳಗ್ಗೆ 7–9 ಅಥವಾ ರಾತ್ರಿ 10ರ ನಂತರ ಪ್ರಯತ್ನಿಸಿ
ಪುಟ ಅರ್ಧಕ್ಕೆ ನಿಲ್ಲುತ್ತೆ	ಬ್ರೌಸರ್ ಹಳೆಯದು	Chrome/Edge ಅಪ್‌ಡೇಟ್ ಮಾಡಿ, Cache ಕ್ಲಿಯರ್ ಮಾಡಿ
Aadhaar name mismatch	DL/RC ಮತ್ತು ಆಧಾರ್‌ನಲ್ಲಿ ಹೆಸರು ಬೇರೆ	ಮೊದಲು ಹೆಸರು ತಿದ್ದುಪಡಿ ಸೇವೆ ಮಾಡಿಸಿ
ಹಳೆಯ ನಂಬರ್ ಕೈಯಲ್ಲಿಲ್ಲ	ಸಿಮ್ ಕಳೆದುಹೋಗಿದೆ	ಆಧಾರ್ OTP ವಿಧಾನ ಬಳಸಿ, ಇಲ್ಲದಿದ್ದರೆ RTO

ಆಧಾರ್ ಲಿಂಕ್ ಆಗಿಲ್ಲದಿದ್ದರೆ ಅಥವಾ OTP ವಿಫಲವಾದರೆ ಗುರುತಿನ ಪುರಾವೆ ಜೊತೆ ಹತ್ತಿರದ RTO ಕಚೇರಿಗೆ ಭೇಟಿ ನೀಡಬೇಕಾಗಬಹುದು.

 ಯಾವಾಗ RTO ಕಚೇರಿಗೆ ಹೋಗಲೇಬೇಕು?

ಆನ್‌ಲೈನ್ ಸೌಲಭ್ಯ ಇದ್ದರೂ ಕೆಲವು ಸಂದರ್ಭಗಳಲ್ಲಿ ಖುದ್ದು ಹೋಗಬೇಕಾಗುತ್ತೆ:

• ನಿಮ್ಮ ಆಧಾರ್‌ಗೆ ಯಾವ ಮೊಬೈಲ್ ನಂಬರ್ ಕೂಡ ಲಿಂಕ್ ಆಗಿಲ್ಲದಿದ್ದರೆ
• DL/RC ನಲ್ಲಿರುವ ಹೆಸರು ಮತ್ತು ಆಧಾರ್‌ನಲ್ಲಿರುವ ಹೆಸರು ತುಂಬಾ ಬೇರೆಯಾಗಿದ್ದರೆ
• ವಾಹನ ಈಗಾಗಲೇ ಬೇರೆಯವರ ಹೆಸರಿಗೆ ವರ್ಗಾವಣೆ ಪ್ರಕ್ರಿಯೆಯಲ್ಲಿದ್ದರೆ
• ವಾಹನದ ಮೇಲೆ ಬ್ಯಾಂಕ್ ಹೈಪೋಥಿಕೇಶನ್/ಬಾಕಿ ಇದ್ದು ದಾಖಲೆ ಬ್ಲಾಕ್ ಆಗಿದ್ದರೆ
• ಹಳೆಯ ವಾಹನವಾಗಿದ್ದು ದಾಖಲೆ ಇನ್ನೂ ಡಿಜಿಟಲ್ ಆಗಿಲ್ಲದಿದ್ದರೆ

ಕರ್ನಾಟಕದಲ್ಲಿ ಹೋಗುವಾಗ ತೆಗೆದುಕೊಂಡು ಹೋಗಬೇಕಾದವು: ಮೂಲ RC/DL, ಆಧಾರ್ ಪ್ರತಿ, ಹೊಸ ಸಿಮ್‌ನ ಪುರಾವೆ, ಪಾಸ್‌ಪೋರ್ಟ್ ಅಳತೆಯ ಫೋಟೋ.

ಇದನ್ನು ಓದಿ:-Voter ID Online Apply 2026: ಉಚಿತವಾಗಿ ಹೊಸ ಮತದಾರರ ಗುರುತಿನ ಚೀಟಿ (Voter ID)ಗೆ ಅರ್ಜಿ ಸಲ್ಲಿಸುವ ಸಂಪೂರ್ಣ ಹಂತ-ಹಂತದ ಗೈಡ್

 mParivahan ಆ್ಯಪ್ ಕೂಡ ಬಳಸಬಹುದು

ವೆಬ್‌ಸೈಟ್ ತೆರೆಯದಿದ್ದರೆ mParivahan ಮೊಬೈಲ್ ಆ್ಯಪ್ ಪ್ರಯತ್ನಿಸಿ. ಇದು ಸರ್ಕಾರದ ಅಧಿಕೃತ ಆ್ಯಪ್, Play Store ಮತ್ತು App Store ಎರಡರಲ್ಲೂ ಉಚಿತವಾಗಿ ಸಿಗುತ್ತೆ.

ನೋಂದಾಯಿತ ಮೊಬೈಲ್ ನಂಬರ್ ಇದ್ದರೆ mParivahan ಸೇವೆಗಳನ್ನು ಬಳಸಲು, RC ಅಥವಾ DL ನ ಡಿಜಿಟಲ್ ಪ್ರತಿಗಳನ್ನು ಡೌನ್‌ಲೋಡ್ ಮಾಡಲು ಮತ್ತು ಕಾಗದರಹಿತ ದಾಖಲಾತಿ ಸೌಲಭ್ಯ ಬಳಸಲು ಸಾಧ್ಯ.

ಇದರ ದೊಡ್ಡ ಲಾಭ ಏನಂದ್ರೆ — ಟ್ರಾಫಿಕ್ ಪೊಲೀಸರು ಕೇಳಿದಾಗ ಒರಿಜಿನಲ್ ಕಾರ್ಡ್ ಬದಲು ಆ್ಯಪ್‌ನಲ್ಲಿರುವ ಡಿಜಿಟಲ್ ಪ್ರತಿ ತೋರಿಸಿದರೂ ಸಾಕು. ಆದರೆ ಆ್ಯಪ್‌ಗೆ ಲಾಗಿನ್ ಆಗಬೇಕಾದರೆ… ಹೌದು, ಮತ್ತೆ ಅದೇ — ಸರಿಯಾದ ಮೊಬೈಲ್ ನಂಬರ್ ಬೇಕು.

 ಮೊಬೈಲ್ ನಂಬರ್ ಅಪ್‌ಡೇಟ್ ಮಾಡುವುದರಿಂದ ಏನು ಪ್ರಯೋಜನ?

ಇದು ಕೇವಲ ಒಂದು ಫಾರ್ಮಾಲಿಟಿ ಅಲ್ಲ. ನಿಜವಾದ ಲಾಭಗಳಿವೆ:

1. ಇ-ಚಲನ್ ಮಾಹಿತಿ ತಕ್ಷಣ ಸಿಗುತ್ತೆ

• ಫಿಟ್‌ನೆಸ್ ನವೀಕರಣ, ಮಾಲಿನ್ಯ ತಪಾಸಣೆ, ಚಲನ್ (ಸಂಚಾರ ದಂಡ) ಮತ್ತು ತೆರಿಗೆ ಪಾವತಿ ಕುರಿತ ಸೂಚನೆಗಳು ಸಕಾಲದಲ್ಲಿ ಬರುತ್ತವೆ. ಹಳೆಯ ನಂಬರ್ ಇದ್ದರೆ ಚಲನ್ ಗೊತ್ತೇ ಆಗಲ್ಲ, ದಂಡ ಬೆಳೀತಾ ಹೋಗುತ್ತೆ.

2. ಎಲ್ಲಾ ಆನ್‌ಲೈನ್ ಸೇವೆಗಳು ಬಳಸಬಹುದು

• ಹಳೆಯ ನಂಬರ್ ಇದ್ದರೆ RC ಡೌನ್‌ಲೋಡ್, ಫಾಸ್ಟ್‌ಟ್ಯಾಗ್ ರೀಚಾರ್ಜ್, ನ್ಯಾಯಾಲಯದ ಚಲನ್ ಪಾವತಿ ಮುಂತಾದ ಆನ್‌ಲೈನ್ ಸೇವೆಗಳು ಬ್ಲಾಕ್ ಆಗುತ್ತವೆ.

3. ವಿಮೆ ಮತ್ತು ನವೀಕರಣ ಜ್ಞಾಪನೆ

• ಇನ್ಶೂರೆನ್ಸ್ ಮುಗಿಯುವ ಮೊದಲು ಮೆಸೇಜ್ ಬರುತ್ತೆ. ಮರೆತು ವಿಮೆ ಇಲ್ಲದೆ ಓಡಾಡಿದರೆ ಅದು ದೊಡ್ಡ ದಂಡ.

4. ವಂಚನೆಯಿಂದ ರಕ್ಷಣೆ

• ಲೈಸೆನ್ಸ್ ಅನ್ನು ಮಾಲೀಕನ ದೃಢೀಕೃತ ಮೊಬೈಲ್ ನಂಬರ್‌ಗೆ ಜೋಡಿಸುವುದು ಸಾರಿಗೆ ದಾಖಲೆಗಳ ಅನಧಿಕೃತ ಬಳಕೆ ತಡೆಯಲು ಸಹಾಯ ಮಾಡುತ್ತದೆ. ನಿಮ್ಮ ದಾಖಲೆಯಲ್ಲಿ ಯಾರಾದರೂ ಬದಲಾವಣೆ ಮಾಡಲು ಯತ್ನಿಸಿದರೆ ನಿಮಗೆ ತಕ್ಷಣ SMS ಬರುತ್ತೆ.

5. ವಾಹನ ಮಾರಾಟ/ಖರೀದಿ ಸುಲಭ

• RC ವರ್ಗಾವಣೆ ಮಾಡುವಾಗ OTP ಬೇಕೇಬೇಕು. ಹಳೆಯ ನಂಬರ್ ಇದ್ದರೆ ಮಾರಾಟವೇ ನಿಂತುಹೋಗುತ್ತೆ.

 ಎಚ್ಚರ ಈ ತಪ್ಪುಗಳನ್ನು ಮಾಡಬೇಡಿ

ಈ ವಿಷಯ ಟ್ರೆಂಡಿಂಗ್ ಆಗಿರುವ ಕಾರಣ ವಂಚಕರು ಸಕ್ರಿಯವಾಗಿದ್ದಾರೆ. ಈ ಕೆಳಗಿನವು ಕಡ್ಡಾಯವಾಗಿ ಪಾಲಿಸಿ:

•  WhatsApp ಅಥವಾ SMS ನಲ್ಲಿ ಬಂದ ಅಪರಿಚಿತ ಲಿಂಕ್ ಮೇಲೆ ಕ್ಲಿಕ್ ಮಾಡಬೇಡಿ
•  “Parivahan Update” ಹೆಸರಿನ APK ಫೈಲ್ ಡೌನ್‌ಲೋಡ್ ಮಾಡಬೇಡಿ
•  ಯಾರಿಗೂ OTP ಹೇಳಬೇಡಿ — ಸರ್ಕಾರ ಎಂದಿಗೂ OTP ಕೇಳುವುದಿಲ್ಲ
•  ಸಾರ್ವಜನಿಕ ವೈ-ಫೈನಲ್ಲಿ ಈ ಕೆಲಸ ಮಾಡಬೇಡಿ
•  ಆಧಾರ್ ನಂಬರ್ ಅಪರಿಚಿತ ವೆಬ್‌ಸೈಟ್‌ನಲ್ಲಿ ಹಾಕಬೇಡಿ

ಸಾರಿಗೆ ಸಂಬಂಧಿತ ಅಪ್‌ಡೇಟ್‌ಗಳಿಗೆ ಯಾವಾಗಲೂ .gov.in ನಲ್ಲಿ ಕೊನೆಗೊಳ್ಳುವ ಅಧಿಕೃತ ಸರ್ಕಾರಿ ಡೊಮೇನ್‌ಗಳನ್ನೇ ಬಳಸಿ; ಪರಿಶೀಲಿಸದ ಮೂರನೇ ವ್ಯಕ್ತಿಯ ವೆಬ್‌ಸೈಟ್, SMS ಲಿಂಕ್ ಅಥವಾ ಸಾಮಾಜಿಕ ಮಾಧ್ಯಮದಲ್ಲಿ ಸೂಕ್ಷ್ಮ ವಿವರಗಳನ್ನು ಹಂಚಿಕೊಳ್ಳಬೇಡಿ.

DL and RC Mobile Number Update 2026-ಪ್ರಮುಖ ಲಿಂಕ್‌ಗಳು

ಸೇವೆ	ಲಿಂಕ್
RC ಮೊಬೈಲ್ ನಂಬರ್ ಅಪ್‌ಡೇಟ್	https://vahan.parivahan.gov.in/mobileupdate/
DL ಮೊಬೈಲ್ ನಂಬರ್ ಅಪ್‌ಡೇಟ್	https://sarathi.parivahan.gov.in/sarathiservice/mobNumUpdpub.do
Parivahan ಮುಖ್ಯ ಪುಟ	https://parivahan.gov.in
Vahan ಸೇವೆಗಳು	https://vahan.parivahan.gov.in/vahanservice/
ಆಧಾರ್ ಮೊಬೈಲ್ ಲಿಂಕ್ ಪರಿಶೀಲನೆ	https://myaadhaar.uidai.gov.in

ಇದನ್ನು ಓದಿ:-Passport Apply 2026: ಮನೆಯಲ್ಲೇ ಕುಳಿತು Pass Port ಗೆ online ಮೂಲಕ apply ಮಾಡುವ 5 simple steps, ಬೇಕಾದ documents, important tips ಎಲ್ಲವನ್ನು ಇಲ್ಲಿ ತಿಳಿಯಿರಿ

DL and RC Mobile Number Update 2026-ಪದೇ ಪದೇ ಕೇಳಲಾಗುವ ಪ್ರಶ್ನೆಗಳು (FAQ)

1. DL ಮತ್ತು RC ಗೆ ಒಂದೇ ಮೊಬೈಲ್ ನಂಬರ್ ಬಳಸಬಹುದಾ?

• ಹೌದು. ಅದೇ ಮೊಬೈಲ್ ನಂಬರ್ ಡ್ರೈವಿಂಗ್ ಲೈಸೆನ್ಸ್ ಮತ್ತು RC ಎರಡೂ ಸೇವೆಗಳಿಗೆ ಕೆಲಸ ಮಾಡುತ್ತದೆ, ಇದರಿಂದ ಎಲ್ಲಾ Parivahan ಅಪ್‌ಡೇಟ್‌ಗಳನ್ನು ಟ್ರ್ಯಾಕ್ ಮಾಡುವುದು ಸುಲಭ.

2. RTO ಗೆ ಹೋಗಲೇಬೇಕಾ?

• ಇಲ್ಲ, ಹೆಚ್ಚಿನ ಸಂದರ್ಭಗಳಲ್ಲಿ RTO ಭೇಟಿ ಅಗತ್ಯವಿಲ್ಲ; ಪ್ರಕ್ರಿಯೆ ಸಂಪೂರ್ಣ ಆನ್‌ಲೈನ್. ಆದರೆ ಆಧಾರ್ ಪರಿಶೀಲನೆ ವಿಫಲವಾದರೆ ಒಮ್ಮೆ RTO ಗೆ ಹೋಗಬೇಕಾಗಬಹುದು.

3. ಯಾವ ದಾಖಲೆಗಳು ಬೇಕು?

• ಡ್ರೈವಿಂಗ್ ಲೈಸೆನ್ಸ್ ನಂಬರ್, DL ಪ್ರಕಾರದ ಜನ್ಮ ದಿನಾಂಕ, OTP ಪರಿಶೀಲನೆಗೆ ಆಧಾರ್ ಕಾರ್ಡ್ ಮತ್ತು ಹೊಸ ಮೊಬೈಲ್ ನಂಬರ್ ಬೇಕು.

4. ಆಧಾರ್ ಇಲ್ಲದೆ ಮಾಡಲು ಸಾಧ್ಯವಾ?

• ಹೆಚ್ಚಿನ ರಾಜ್ಯಗಳಲ್ಲಿ ಆಧಾರ್ ಲಿಂಕ್ ಆದ OTP ಪರಿಶೀಲನೆ ಅಗತ್ಯ; ಆಧಾರ್ ಲಿಂಕ್ ಆಗಿಲ್ಲದಿದ್ದರೆ ಆನ್‌ಲೈನ್ ಪ್ರಕ್ರಿಯೆ ಕೆಲಸ ಮಾಡದಿರಬಹುದು. ಆಗ ಮೂಲ ದಾಖಲೆಗಳೊಂದಿಗೆ RTO ಗೆ ಹೋಗಿ ಮ್ಯಾನುವಲ್ ಅಪ್‌ಡೇಟ್ ಕೋರಬೇಕು.

5. ನನ್ನ ಬಳಿ 3 ವಾಹನಗಳಿವೆ, ಪ್ರತಿಯೊಂದಕ್ಕೂ ಪ್ರತ್ಯೇಕವಾಗಿ ಮಾಡಬೇಕಾ?

• ಹೌದು. ಪ್ರತಿ ವಾಹನದ RC ಪ್ರತ್ಯೇಕ ದಾಖಲೆ. ಪ್ರತಿಯೊಂದಕ್ಕೂ ಒಂದೊಂದಾಗಿ ಪ್ರಕ್ರಿಯೆ ಪುನರಾವರ್ತಿಸಬೇಕು.

6. ಮಾಡದಿದ್ದರೆ ಏನಾಗುತ್ತೆ?

• ರಸ್ತೆ ಸಾರಿಗೆ ಸಚಿವಾಲಯದ ಹೊಸ ನಿಯಮಗಳ ಪ್ರಕಾರ ಲೈಸೆನ್ಸ್‌ಗೆ ಫೋನ್ ನಂಬರ್ ಲಿಂಕ್ ಮಾಡುವುದು ಕಡ್ಡಾಯವಾಗಿದ್ದು, ಮಾಡದಿದ್ದರೆ ದಂಡ ವಿಧಿಸಬಹುದು ಮತ್ತು ಕೆಲವು ಸಂದರ್ಭಗಳಲ್ಲಿ ಲೈಸೆನ್ಸ್ ಅಮಾನತುಗೊಳ್ಳಬಹುದು.

7. ಹಳೆಯ ಸಿಮ್ ಕಳೆದುಹೋಗಿದೆ, ಏನು ಮಾಡಲಿ?

• ಆಧಾರ್ OTP ವಿಧಾನ ಬಳಸಿ. ಆಧಾರ್‌ಗೆ ಹೊಸ ನಂಬರ್ ಲಿಂಕ್ ಆಗಿದ್ದರೆ ಸಾಕು, ಹಳೆಯ ಸಿಮ್ ಬೇಕಾಗಿಲ್ಲ.

8. ಪತಿಯ ಹೆಸರಿನ ಗಾಡಿಗೆ ಪತ್ನಿಯ ನಂಬರ್ ಹಾಕಬಹುದಾ?

• ತಾಂತ್ರಿಕವಾಗಿ ಸಾಧ್ಯ, ಆದರೆ ಶಿಫಾರಸು ಮಾಡುವುದಿಲ್ಲ. ಆಧಾರ್ ದೃಢೀಕರಣ ಮಾಲೀಕರದ್ದೇ ಆಗಿರಬೇಕು. ಮುಂದೆ ಮಾರಾಟ ಅಥವಾ ವರ್ಗಾವಣೆ ವೇಳೆ ಸಮಸ್ಯೆ ಆಗಬಹುದು.

9. ಒಮ್ಮೆ ಮಾಡಿದ ಮೇಲೆ ಮತ್ತೆ ಬದಲಾಯಿಸಬಹುದಾ?

• ಹೌದು. ಎಷ್ಟು ಬಾರಿ ಬೇಕಾದರೂ ಬದಲಾಯಿಸಬಹುದು, ಮಿತಿ ಇಲ್ಲ.

10. ಕರ್ನಾಟಕದಲ್ಲಿ ಈ ಸೇವೆ ಲಭ್ಯವಿದೆಯಾ?

• ಹೌದು. ಕರ್ನಾಟಕ ಸೇರಿದಂತೆ ಎಲ್ಲಾ ರಾಜ್ಯಗಳಲ್ಲಿ Vahan–Sarathi ವ್ಯವಸ್ಥೆ ಜಾರಿಯಲ್ಲಿದೆ.

 ಕೊನೆಯ ಮಾತು

ಸ್ನೇಹಿತರೇ, ಇದು ಕೇವಲ 5 ನಿಮಿಷದ ಕೆಲಸ. ಆದರೆ ಇದನ್ನು ಮಾಡದೆ ಇದ್ದರೆ ಮುಂದೆ ಗಂಟೆಗಟ್ಟಲೆ RTO ಕ್ಯೂನಲ್ಲಿ ನಿಲ್ಲಬೇಕಾಗಬಹುದು. ಇವತ್ತೇ ಸಮಯ ಮಾಡಿಕೊಂಡು ನಿಮ್ಮ DL ಮತ್ತು RC ಎರಡಕ್ಕೂ ಮೊಬೈಲ್ ನಂಬರ್ ಪರಿಶೀಲಿಸಿ, ಹಳೆಯದಿದ್ದರೆ ಅಪ್‌ಡೇಟ್ ಮಾಡಿಕೊಳ್ಳಿ.

ನಿಮ್ಮ ಮನೆಯಲ್ಲಿ, ಸ್ನೇಹಿತರ ಬಳಗದಲ್ಲಿ ವಾಹನ ಇರುವ ಎಲ್ಲರಿಗೂ ಈ ಮಾಹಿತಿ ತಲುಪಿಸಿ. ವಿಶೇಷವಾಗಿ ಹಿರಿಯರಿಗೆ — ಅವರಿಗೆ ಇಂತಹ ಸೂಚನೆಗಳು ಗೊತ್ತಾಗದೆ ಇರುವ ಸಾಧ್ಯತೆ ಹೆಚ್ಚು.

ಈ ಮಾಹಿತಿ ಉಪಯುಕ್ತ ಅನಿಸಿದರೆ ಶೇರ್ ಮಾಡಿ ಇನ್ನಷ್ಟು ಸರ್ಕಾರಿ ಯೋಜನೆ ಮತ್ತು ಉದ್ಯೋಗ ಮಾಹಿತಿಗಾಗಿ ನಮ್ಮ ವೆಬ್‌ಸೈಟ್‌ಗೆ ಭೇಟಿ ನೀಡುತ್ತಿರಿ.

ಸೂಚನೆ: ಈ ಲೇಖನವನ್ನು ಅಧಿಕೃತ ಸರ್ಕಾರಿ ಪೋರ್ಟಲ್‌ಗಳು ಮತ್ತು ವಿಶ್ವಾಸಾರ್ಹ ಸುದ್ದಿ ಮೂಲಗಳ ಆಧಾರದ ಮೇಲೆ ಸಿದ್ಧಪಡಿಸಲಾಗಿದೆ. ಪೋರ್ಟಲ್‌ನ ಪ್ರಕ್ರಿಯೆ ರಾಜ್ಯದಿಂದ ರಾಜ್ಯಕ್ಕೆ ಸ್ವಲ್ಪ ಭಿನ್ನವಾಗಿರಬಹುದು. ಅಂತಿಮ ಮಾಹಿತಿಗಾಗಿ parivahan.gov.in ಅಧಿಕೃತ ವೆಬ್‌ಸೈಟ್ ಅಥವಾ ಹತ್ತಿರದ RTO ಕಚೇರಿಯನ್ನು ಸಂಪರ್ಕಿಸಿ.